اسمي فار وشكلي فار
بس مش فار ولا عمري افر
ذل القيود ما يهزني
نور الحق بيشدني
م الالم للامل
للحلم
بعد ما جيش الظلم
فككني من نفسي
عشان ابن الغني
بس الامل كان الحياة
وبالعمل تولد حياة
كل الفيران بيها نعتني
اصل الغني ف بلدي
هنا الغني
هو غير الغني
المقتني كل الحياة
وفوق الحياة عايز له
كام مليار حياة
لا
عاوز كل الحياة
وان شا الله اللي
ما معاه اي حياة
يموت
وياخد الفيران اللي معاه
هو ده الغني
ابن الغني ابن الغني ابن الغني
ابن ستين مليون غني
وانا اسمي فار وشكلي فار
بس مش فار ولا عمري افر
ولا عمري اخاف ولا اكون فار
ولا اتلهي ببواقي عيش
ولا استحي ولا اخاف م الجيش
ولا جيش الظلم ولا جيش القهر
ولا جيش الذل لو حكم مصر
وان حكم مصر تبقى مش مصر
ولا اكون رعديد
باخاف على بواقي العيش
ولا أكون متعنتر
وأضيع صوتي ف لحظة طيش
بس نفسي ف بلدي
نّرقي كل الفيران
بلاش نكون انسان
انا عارف ان ده ف بلدنا مستحيل
مادام البلد فيها كام فيل
بياخدوا العشب كل العشب
وبواقي العشب
تتقاتل عليها الفيران
بس بلاش نكون فيران
وبلاش نكون خرفان
وبلاش نكون فيلة
اقل من قلة القليل
وفيران اكتر بكتير
من كترة مية النيل
نكون ايه نكون ايه
ف عالم الحيوان
