نور الهوى بحر الجرا ح
عطشان انا
اي لحظة بعد ندم
كل شيء من غيرك عدم
رغم ان ما اعرف غير
كلمة واحدة اتعلمتها
كرهتني حبيبتي خانتني
عمري ما كرهتها
الرب واحد والحب واحد
والنبض واحد لكل واحد
كان الشقا كان التراب
من غير مداين كان خراب
وسط البلاد كان ف بلد
من عقلها العلم اتولد
من قلبها الحب اتوجد
من نهرها شبعوا الجياع
وبأمرها الكل طاع
وف عشقها انا عمري ضاع
كانت سما غير السما
كانت قبلة الارض
كانت هيا الحياة
وبعطفها
وزعت هي الحياة
شعبها بكل الشعوب
كان بيزرع الحبوب
بنى بالعلم عمران
واتحدى بيه البشر
وغلب بيه الزمان
العمل كان نبض قلبه
وقلبه دلوقتي خلاص
من كتر ما شاف من الام
بقى قلب من رصاص
معجون بصلب
مصبوب نحاس
على مخرجة مقفول فولاذ
وعشان كده البلد دي
بقى حالها كده
موجوع انا
من كتر ما شفت ف هواكي
كرهت حبي و ضعفي معاكي
حكمك غير شعبك رضيتي
وحكمك واحد من شعبك
علينا افتريتي
ونسيتي
اننا مصدر سعادتك
اننا قوة حياتك
اننا دمك وروحك
اننا ف الاصل ذاتك
اننا رغم قساوتك عمرنا
ما كفرنا بيكي
اننا يوم انكسارك
والسبب كان رب دارك
التفتي ما التقيتي غيرنا احنا
اللي اندبحنا وانجرحنا
والنار حرقت سطوحنا
كسرنا سجون ظلمك
رفعنا تاني ليكي علمك
وغزلنا بدمنا حروف اسمك
ورجعنا تاني
للذل تاني
للظلم تاني
ليه يا بلادي مستكترة
كسرة رغيف
مسكن نضيف
حياة كريمة
أو موت شريف
مش احنا برضه
اللي بنينا
بالعرق والكد دارك
من عضامنا طلعتي نارك
واول مين اتحرق كنا
جبارة ودايما تتجبري
ليه لأما ذليلة
لحكمك مفتري
فين الندى فين الربيع
يا ام البنات يا ام الطفل الرضيع
ليه الشتات تخلينا نبيع
نسافر نهاجر
نبحر ندور على قلب
اه قلب متحجر
احسن من قلب متجبر
يا اللي كنتي قلب اخضر اخضر
ليه القسى
عمرك ماكنتي حاجدة
عمرك ماكنتي قاسية
خدتي منا اكتر ما اديتينا
ولا يمكن دي صرخة غضب
من كتر ما شفنا من ويل
ومن جراح ومن صخب
قلينا شوية الادب
زودت ف الكلام
ما انتي يا ما ياما زودتي ف الفعل
هتفرحي لما اسيبك على عماكي
والاسم متيم ف هواكي
ليه كتير من شبابك طفش وسابك
دانا حتى خايف اصحى
القاكي وأسالك
ايه اللي جابك
تقولي الريحة خنقتني
والظلم موتني ونفسي كرهت
نفسي كرهتني
باحذرك
يوم ما نسيب عمرنا تاني مانرجع
يوم ما نقوم عمرنا تاني ما نهجع
يوم ما نصوم الافطار مليار مدفع
يوم ما هيفيض الضلام
يوم ما هيطير الحمام
يوم اهو يوم غير سلام
هنقاتلك كالعدوة
بغضب بكره بحب
بجنون بكل قوة
واليوم دا جاي قريب
ما دام كل ثانية بتزيد الهوة
ليست هناك تعليقات:
إرسال تعليق